အထပ်မြင့်အဆောက်အအုံများ စစ်ဆေးခြင်း အလျင်အမြန်ပြီးစီးဖို့ လုပ်ငန်းရှင်အချို့မှ မျှော်လင့်နေ

ဆောက်လုပ်ရေးလုပ်ငန်းများအတွင်း အဆောက်အအုံများဆောက်လုပ်ခွင့် ယာယီဆိုင်းငံ့ခြင်းများနှင့်စစ်ဆေးမှု ဆောင်ရွက်နေဆဲ အခြေအနေများကြောင့် လုပ်ငန်းရှင်များအနေဖြင့် ဆောက်လုပ်ရေးလုပ်သားများ လျော့ချနေရသည့် အခြေအနေများဖြစ်ပေါ်လျက် ရှိနေပြီး အိမ်ခြံမြေဈေးကွက် အနေအားဖြင့်လည်း ငွေကြေးရင်းနှီးမြှုပ်နှံထားသူများ၊ ဆက်စပ်ရာလုပ်ငန်းရှင်များအနေဖြင့် ဘဏ်ကို မှီခိုအားထားလုပ်ကိုင်ရသော အခြေအနေများ ရှိကြသောကြောင့် အတိုးနှုန်းများ ပိုမိုရင်ဆိုင်ရနေကြကြောင်း ဆောက်လုပ်ရေးလုပ်ငန်းရှင်အချို့မှ ပြောကြားချက် အရ သိရသည်။ အချို့ဆောက်လက်စတိုက်များအနေဖြင့်လည်း ကြိုပွိုင့်ရောင်းချထားသည့် အခြေ အနေများ၊ မြေရှင်နှင့် ကန်ထရိုက်၊ အခန်းဝယ်သူတို့အကြား စာချုပ်စာတမ်းဆိုင်ရာ အချက်အလက်များ ငွေပေးငွေယူ ကိစ္စများ ပြန်လည် ညှိုနှိုင်းတိုင်ပင်ရသည့် အနေအထားများကြောင့် အချိန်၊ လုပ်အားနှင့်ငွေကြေး စသည့်အကြောင်းအမျိုးမျိုး ထိခိုက်မှုများရှိလာကြောင်းနှင့် လုပ်ငန်းလည်ပတ်မှုအတွက် ယခင်ထဲက အခက်ခဲ ရှိနေသည့် လုပ်ငန်းရှင်များက ဆောက်လုပ်ရေးလုပ်သားများအပါအ၀င် ၀န်ထမ်းအချို့ကိုပါ လျော့ချနေရသည်ဟု ဗိုလ်တစ်ထောင်မြို့နယ်ရှိ ဆောက်လုပ်ရေးလုပ်ငန်းရှင်တစ်ဦးက Estate Myanmar Enterprise အိမ်ခြံမြေ အကျိုးဆောင်ကုမ္ပဏီ၏ သတင်းအဖွဲ့သို့ ပြောကြားသည်။

 

မေလလယ်ခန့်မှ စပြီးအထပ်မြင့်တိုက်များ ယာယီဆောက်လုပ်ခွင့်ရပ်ဆိုင်းထားခဲ့ကာ အထပ်မြင့်အဆောက်အအုံများစစ်ဆေးခြင်းကို ရန်ကုန်မြို့တော်စည်ပင်သာယာရေးကော်မတီမှ ယခုလ ဇူလိုင် ၁ ရက်နေ့မှစ၍ စတင်စစ်ဆေးနေပြီး သတ်မှတ် မူဝါဒစံညွှန်းများနှင့် ကိုက်ညီသော အဆောက်အအုံများကို ဆောက်လုပ်ခွင့်ဆက်လက်ခွင့်ပြုချထားပေးမည်ဖြစ်သည်။

 

သတ်မှတ်ချက်များနှင့် ကိုက်ညီသော ရှစ်ထပ်ခွဲအထိ အဆောက်အအုံများ ဆောက်လုပ်ခွင့်ကို ရန်ကုန်မြို့တော်စည်ပင်သာယာရေးကော်မတီမှ စိစစ်ခွင့်ပြုပေးခြင်း ဖြစ်ပြီး ကိုးထပ် မှ ၁၂ ထပ်ခွဲထိ အဆောက်အအုံများကို ရန်ကုန်မြို့တော်စည်ပင်သာယာရေးကော်မတီနှင့် ပညာရှင်များ၊ အဆောက်အအုံဆောက်လုပ်ခြင်းဆိုင်ရာ စံချိန်စံညွှန်းများကြီးကြပ်စစ်ဆေးရေးအဖွဲ့က စိစစ်ခွင့်ပြုခြင်းဖြစ်ပြီး ၁၃ ထပ်နှင့် အထက်ရှိသော အဆောက်အအုံများကို အထပ်မြင့် အဆောက်အအုံများ စီမံကိန်း ကြီးကြပ်စစ်ဆေးရေး ပညာရှင်များအဖွဲ့မှ စစ်ဆေးဆောင်ရွက်ကာ ရန်ကုန်တိုင်းဒေသကြီးအစိုးရအဖွဲ့၏ ဆုံးဖြတ်ချက်ဖြင့် စီစဉ်ဆောင်ရွက်ရခြင်း ဖြစ်သည်။


www.estatemyanmar.com.mm

Facebook comments

Logo
 Tel: (+95)-9-5006267, (+95)-9-43157 571, (+95)-9-43157 572

 Head Office: No. (B/404), Min Dhama Luxury Condominium, Min Dhama Road, Mayangone Township, Yangon, Myanmar.