အာရှ၏ နေထိုင်စရိတ်အမြင့်မားဆုံး မြို့များတွင် ရန်ကုန် ပါဝင်နေဆဲ
ရန်ကုန်မြို့သည် အာရှတိုက်တွင် နေထိုင်စရိတ် အကြီးမြင့်ဆုံးမြို့များတွင် ပါဝင်နေဆဲဖြစ်ပြီး
ဂျာမနီက မြူးနစ်မြို့၊ ကာတာက ဒိုဟာမြို့နှင့် အီတလီက ရောမမြို့များထက် ပိုမိုကာ
နေထိုင်စရိတ်ကြီး မြင့်သော မြို့တစ်မြို့အဖြစ် ရှိနေကြောင်း ဇွန် ၂၁ ရက်တွင် Mercer
အဖွဲ့အစည်းက ထုတ်ပြန်ခဲ့သော ကမ္ဘာ့နိုင်ငံအသီးသီး၏ လူနေမှုစရိတ် သုတေသန
စာတမ်းတွင် ဖော်ပြထားသည်။
Mercer အဖွဲ့အစည်းက နှစ်စဉ်ထုတ်ပြန်သော နိုင်ငံခြားသားများအတွက် နိုင်ငံအသီးသီးက
နေထိုင်စရိတ်ကြီးမြင့်သော မြို့များကို ဖော်ပြချက်အရ ရန်ကုန် မြို့သည် ယခုနှစ်အတွက်
၆၇ ခုမြောက် နေထိုင်စရိတ် အကြီးမြင့်ဆုံးမြို့အဖြစ် သတ်မှတ်ခံခဲ့ရသည်။
နေထိုင်စားသောက်စရိတ်၊ သွားလာရေးစရိတ်များနှင့် ဖျော်ဖြေရေးစရိတ်များကို အခြေခံ
တွက်ချက်သော ထိုစစ်တမ်းအရ ပြီးခဲ့သောနှစ်တွင် ရန်ကုန်မြို့သည် ၃၉ ခုမြောက်
ကမ္ဘာပေါ်တွင် နေထိုင်စရိတ် အကြီးမြင့်ဆုံးမြို့ ဖြစ်ခဲ့သော်လည်း ယခုနှစ်တွင် ၆၇ ခုမြောက်
မြို့တော်အဖြစ် သတ်မှတ်ခံရခြင်းဖြစ်သည်။
ရန်ကုန်မြို့သည် အာရှတိုက်တွင် နေထိုင်စရိတ် အကြီးမြင့်ဆုံးမြို့နယ်များတွင် ပါဝင်နေ
သေးပြီး အိမ်နီးချင်းနိုင်ငံများအပြင် ဂျာမနီက မြူးနစ်မြို့၊ အိန္ဒိယက နယူးဒေလီ၊ ဆွီဒင်က
စတော့ဟုမ်း၊ ကာတာက ဒိုဟာမြို့နှင့် အီတလီက ရောမမြို့များထက် ပိုမိုကာ နေထိုင်စရိတ်
ကြီးမြင့်သော မြို့တစ်မြို့ဖြစ်ကြောင်း ဖော်ပြထားသည်။
အာရှတိုက်တွင် နေထိုင်စရိတ်အကြီးမြင့်ဆုံးနိုင်ငံများအဖြစ် ဟောင်ကောင်၊ ဂျပန်၊ စင်ကာပူ
နှင့် တရုတ်နိုင်ငံများဖြစ်ပြီး ကမ္ဘာပေါ်တွင် နေထိုင်စရိတ် အကြီးမြင့်ဆုံးနိုင်ငံအဖြစ်
တောင်အာဖရိကမှ အန်ဂိုလာနိုင်ငံ၊ ဒုတိယစျေးအကြီးမြင့်ဆုံး နိုင်ငံအဖြစ် ဟောင်ကောင်၊
တတိယအဖြစ် ဂျပန်နိုင်ငံတို့ဖြစ်ကြောင်း စာတမ်းတွင် ဖော်ပြထားသည်။
ရန်ကုန်မြို့တွင် နိုင်ငံခြားသားခရီးသည်များ ပိုမိုဝင်ရောက်လာသည်နှင့်အတူ ခရီးသွား
ကုန်ကျစရိတ်များ၊ သွားလာဆက်သွယ်ရေးစရိတ်များမှာ ယခင်ကထက် သိသာစွာသက်သာ
လာသည့်အတွက် နေထိုင်မှု စျေးအကြီးဆုံးနိုင်ငံစာရင်းမှ တဖြည်းဖြည်းလျော့ကျလာပြီး
နိုင်ငံခြားသားများအတွက် စရိတ်သက်သာသော နိုင်ငံတစ်နိုင်ငံဖြစ်လာကြောင်း ဝင်းမြန်မာ
ခရီးသွားအေဂျင်စီမှ ဦးစိန်အောင်လေးက ပြောသည်။
''ရန်ကုန်မြို့မှာ နိုင်ငံတွင်း ခရီးသွားလုပ်ငန်းတွေကို ပိုမိုဆွဲဆောင်နိုင်ခဲ့ပြီး နိုင်ငံခြားသား
ခရီးသည် ပိုမိုဝင်ရောက်လာတာနဲ့အတူ နိုင်ငံတွင်း သွားလာတည်းခိုစရိတ်တွေ သိသိ
သာသာလျော့ကျလာခဲ့ပါတယ်။ ဟိုတယ်တွေ၊ စားသောက်ဆိုင်တွေလည်း အရင်ကထက်
သိသိသာသာများလာခဲ့ပြီးတော့ နိုင်ငံခြားသား ခရီးသည်တွေအတွက် ရွေးချယ်စရာများလာ
တဲ့အပြင် ပြိုင်ဘက်တွေများလာလို့ စျေးနှုန်းတွေလည်း လျော့လာပါတယ်''ဟု ၄င်းက
ပြောသည်။