လမ်းသစ်အိမ်ရာကို (၃)နှစ် စီမံကိန်းဖြင့် ဆောက်လုပ်အကောင်အထည်ဖော်မည်
ဆောက်လုပ်ရန်ကြန့်ကြာနေသည့် လမ်းသစ်အိမ်ရာစီမံကိန်း ရတနာပိုင်တိုင် စိုက်ထူခြင်းကို နိုဝင်ဘာလ (၁၈)ရက်က ပြုလုပ်ခဲ့ပြီး စီမံကိန်းအားလုံးကို (၃)နှစ်ကြာဆောက်လုပ်အကောင်ထည်ဖော်သွားမည်ဟု ဆောက်လုပ်ရေးဝန်ကြီးဌာနမြို့ပြနှင့် အိမ်ရာဖွံ့ဖြိုးရေးဦးစီးဌာနမှ တာဝန်ရှိသူ တစ်ဦးက ပြောဆိုသည်။
အခက်အခဲရှိ
"လမ်းသစ်ရိပ်သာ မူလအဆောက်အအုံတွေကို ယာယီရွှေ့ပြောင်းပြီး ပြန်လည်တည်ဆောက်ဖို့အတွက် ကြိုးပမ်းဆောင်ရွက်ခဲ့တာဖြစ်ပါတယ်။ မူလနေထိုင်သူတွေကို စနစ်တကျနေရာ ပြန်လည်ချထားနိုင်ဖို့အတွက် ယာယီနေထိုင်မှုတွေကို စီစဉ်ဆောင်ရွက်ပေးရတဲ့ အခက်အခဲ တွေရှိပါတယ်" ဟု ရန်ကုန်တိုင်းဒေသကြီးဝန်ကြီးချုပ်ဦးဖြိုးမင်းသိန်းက ပြောဆိုသည်။
အဆိုပါ အိမ်ရာတည်ဆောက်ရေးလုပ်ငန်းများအတွက် တင်ဒါခေါ်ယူမှုကို (၂၀၁၆)ခုနှစ် အတွင်းပြုလုပ်ခဲ့ပြီး အိမ်ရာတည်ဆောက်ရေးအတွက် မူလနေထိုင်သူများနှင့် အကြိမ်ကြိမ်ညှိနှိုင်း ဆွေးနွေးမှုများပြုလုပ်ခဲ့ခြင်းဖြစ်သည်။
ကြန့်ကြာနေ
လမ်းသစ်ရိပ်သာ ပြန်လည်တည်ဆောက်ရန် မူလနေထိုင်သူများနှင့် ဆွေးနွေးမှုများကို (၂၀၁၄)ခုနှစ်အတွင်း စတင်ဆောင်ရွက်ခဲ့ပြီး အဆင်မပြေမှုများကြောင့် လုပ်ငန်းတည်ဆောက်ရန် ကြန့်ကြာနေခြင်းဖြစ်သည်။ လက်ရှိတွင် မူလနေထိုင်သူများကို ပြောင်းရွှေ့စရိတ်နှင့် ပြန်လည် ငှားရမ်းနေထိုင်ရန် အိမ်ငှားခများသတ်မှတ်ထားပြီး နှစ်ဦးနှစ်ဖက်ပြေလည်မှုများကြောင့် စတင်ဆောက်လုပ်အကောင်အထည်ဖော်ခြင်းဖြစ်သည်။
Source : The Myanmar Time